Preaching in Geez Language about Hamle Gabriel/የሐምሌ ገብርኤል ስብከት በግእዝ ቋንቋ ...

በስመ አብ ወወልድ ወመንፈስ ቅዱስ አሐዱ 
አምላ

ሊቃውንት፤ ካህናት፤ ዲያቆናት ምእመናን አበዉ ወአኀው እማት ወአኀት ኵልክሙ በሐክሙ እብል በስመ እግዚአብሔር ወእግዚአብሔር ይሰባሕ በይነ ዘአብጽሐነ እስከ ዛቲ ሰዓት አሜን።

ዮም በዛቲ ዕለት በፈቃደ እግዚአብሔር ንትሜሀር በይነ ተራድኦቱ ለቅዱስ ገብርኤል መልአክ ወክልኤቱ እም ወሕጻን ሰማዕታት ዘይሰመዩ ቅርቆስ ወኢየሉጣ፡ እለ ናከብር ሎሙ ዝክረ በአሎሙ  ዓመ ዐሠርቱ ወ ተሰዓቱ ለሐምሌ በበ ዓመቱ እስመ በዛቲ ዕለት ውእቶሙ ኮኑ ሰማዕተ በሐገረ ሮሜ።

 በዝንቱ በአል ንሐትት ሕየንተ ታሪክ ዘይሰመይ ዘመነ ሰማዕታት ወዘተፈጸመ ቅድመ እሥራ ምዕት ዓመተ ምህረት።

ዝንቱ ዘመን እምዐሠርቱ ምዕት ወስድሳ እስከነ ሠለስቱ ምእት ዐሠርቱ ወክልኤቱ ዓ/ም ድኅረ ክርስቶስ ውእቱ፤ ወንጼውኦ  “ዘመነ ሰማዕታት” አው “ዘመነ ስደት” ብሒለነ፤ እስመ በዝንቱ ዘመን ብዙኃን ክርስቶሳውያን ተሰዱ ወተቀትሉ በአላውያን ነገሥታተ ሮም፤ በእንተ ዘአምኑ በክርስቶስ ወሰምዑ ክርስቶስሃ ከመ ወልደ እግዚአብሔር ውእቱ፤ ወተሰይሙ በስሙ ተብሒሎሙ “ፆታ ክርስቶስ”።

 ወነገሥታተ ዝንቱ ዘመን አው ነገስታተ ሮም እንዘ ያቀውሙ ጣዖታተ በስሞሙ ወበ መልክኦሙ፡ ወአዘዙ ኵሎሙ ዘይነብሩ በታሕተ ሥልጣኖሙ ከመ ይስግዱ ለጣዖታት ዘአቀሙ በስሞሙ ወያምልክዎሙ።

በከመ አለበውኩክሙ በሙባአ ትምህርትየ በዝንቱ በአል ንትሜሀር በይነ ተራድኦተ አሐዱ መልአክ ዘስሙ ገብርኤል ወበይነ ኀይለ እምነት በኀበ አማንያን ከመ ኢየሉጣ ወቂርቆስ ዘይመስሉ አው ከመ ክልኤቱ ሰማዕታት፡፡

ሰማዕት አው ሰማዕታት ቢሂል ሰብእ ዘተቀትለ በይነ ዘተናገረ ጽድቀ በእንተ ክርስቶስ አው በእንተ አሚን በክርስቶስ ቅድመ አላውያን ነገሥታት። አው ብእሲ ወብእሲት እለ ተቀትሉ በይነ ዘተናገሩ ጽድቀ በእንተ ክርስቶስ በቅድመ አላውያን እንበለ ይፍርሁ ሞተ ሥጋ።

በከመ ይቤ ጳውሎስ በመልእክቱ ኀበ ዕብራውያን፤ መላእክት ውእቶሙ መናፍስት ዘኢይትገሠሱ ወዘኢይትረአዩ በአካለ ሥጋ ወግብሮሙሰ ዘይትፌነዉ እም ኀበ እግዚአብሔር ለተራድኦት ወለአቂቦት ኪያነ ዘነአምን ክርስቶስሃ ከመ ወልደ እግዚአብሔር ውእቱ። “አኮኑ ኵሎሙ መላእክት መንፈስ እሙንቱ ወይትፌነዉ ለመልእክት በእንተ እለ ሀለዎሙ ይረሱ ሕይወተ ዘለዓለም” ። ዕብ. 1፡14

ቅድመ እትናገር በይነ ታሪከ በአል ዘዮም መፍትው እንግርክሙ በእንተ ቅዱስ ገብርኤል ዘይሰመይ በአፈ ሊቃውንት ከመ ኮነ ሰባኬ ቃለ እግዚአብሔር  ወመጋቤ ሐዲስ በቅድምና፤ ወበእንተዝ ነአምሮ ለገብርኤል መልአክ በአበይት ተአምራት ሠለስቱ፡

ቀዳማይ ተአምር፡ ውእቱ ገብርኤል ወጠነ ትምህርተ ስብከት፡ ወሰበከ መላእክተ በዓለመ መላእክት በዕለተ ሰንበት እንዘ ይብል “ንቁሙ በበ ሕላዌነ እስከ ንረክቦ ለአምላክነ” ወሰበኮ ለዝንቱ ስብከት ሶበ ተሀውኩ መላእክት በክህደተ ሳጥናኤል መልአክ አመ ይቤ “አነ ፈጠርክዋ ለዛቲ ዓለም ወፈጠርኩ ኪያክሙ አልቦ ካልእ ፈጣሪ ዘእንበሌየ”

ካልአይ ተአምር ፡ ገብርኤል ተፈነወ ፍጡነ እም ኀበ አምላኩ ከመ ይርድኦሙ ለዳንኤል ነቢይ ወለሠለስቱ ደቂቅ በአጺዎተ አፈ አናብስት ወበአጥፍኦተ እሳት ከመ ኢይሙቱ እንበለ ኃጢአቶሙ ወይትአወቅ ኀይለ እምነት ጽንእት። ወበዝንቱ ተአምር ብዙኃን ተመይጡ እምነ አምልኮ ጣኦት ወአምኑ በአምላከ ዳንኤል ወበሰለስቱ ደቂቅ

ወሣልስ ተአምር ፦ ገብርኤል ተፈነወ እምነ አምላኩ ኀበ ድንግል ወቅድስት ማርያም እመ አምላክ ከመ ያብሥራ ወይንግራ ምሥጢረ ሥጋዌ ወከመ ተሐርየት ለከዊነ እመ አምላክ። “ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ ወቡርክት አንቲ እምአንስት …”

ወራብዕ ተአምር፡ ገብርኤል አቍረረ ፍሉሐ ማየ፦

 ከመ መጽሐፈ ገድሎሙ ለቅድስት ኢየሉጣ ወቅዱስ ቂርቆስ ይቤ ሐገረ ኢየሉጣ ይትበሐል አንጌቤን ወዝንቱ መካን ውእቱ አድያም ዘሐገራት እለይትቀነዩ በታህተ ነገሥታተ ሮም። ወዝንቱ ዘመን ዘመነ አላውያን ውእቱ።

 ወአመ ኮነ ዕድሜሁ ለቂርቆስ ሠለተ ዓመተ ተጸውአት ኢየሉጣ ኀበ መኮንነ ሐገር ወተጠየቀት በእንተ አምልኮተ ጣዖት ወአውሥአቶ ወትቤሎ ኦ መኮንን ሀሎ ሕጻን ዘሠለስቱ ዓመት መዋዕሊሁ፤ ተሰአል ኪያሁ።

ወመኮንን ፈነወ ሐራሁ ኀበ ሀሎ ሕጻን ቂርቆስ ወሐራ ረከቦ ለቂርቆስ ሕፃን አብጽሆ ኀበ መኮንን፤ ወመኮንን ይቤሎ ለሕጻን በሐከ ኦ ፍሡሕ ሕፃን፤ ወነበቦ በእንተ አምልኮተ አማልክቲሁ፤

ወአውስአ ቂርቆስ በመንፈሰ እግዚአብሔር ወረገሞሙ ለንጉሥ ወለመኳንንቲሁ ወለአማልክቲሁ እስከ ይደነግፁ ኵሎሙ እለሀለዉ መስለ መኮንን ።

ወተምአ መኮንን ወአዘዘ አግብርቲሁ ከመ ይደዩ ማየ ውስተ ዐባይ ጽሕርት ዘብርት ወያፍልሕዋ ውስተ እሳት ወኮነ ድምጸ ፍልሐታ ለጽሕርት ከመ ነጎድጓደ ክረምት። ወይቤ ቅዱስ ያሬድ “ድምጻ ለጽሕርት ከመ ነጓድጓደ መብረቅ”

ሕፃን ወእሙ ሶበ ቦኡ ውስተ ጽሕርት እንዘ ይሠምዑ ክርስቶስ ከመ ወልደ እግዚአብሔር ውእቱ ፍጡነ መጽአ መልአከ እግዚአብሔር ዘስሙ ገብርኤል ወአቁረሮ ለኃይለ እሳት ። በከመ ተጽሕፈ በኦሪት ዘከመ ፈነወ መልአኮ ወአድኀኖሙ ለሠለስቱ ደቂቅ እምእሳት ዘይነድድ፤ ወገብረ ከማሁ በኢየሉጣ ወቂርቆስ ፍቁራኒሁ ወዘተአመኑ ቦቱ።

ናሁ ንትመየጥ ኀበ ርእስነ ወንሕትት ልቡናነ። ዘፈነወ መልአኮ ወአድኀኖሙ ለዳንኤል፤ ወለሰለስቱ ደቂቅ ወለ ኢየሉጣ ወቂርቆስ ውእቱ እግዚአብሔር ዘትማልም ወዮም፤ ወናሁ ይረድአነ ወያድኅነነ አላ መፍትው ብነ እምነት ዘአልቦ ነቅእ ወዘአልቦ ፍርሃት።

በዝንቱ ዘመን ዘመነ ዚአነ ንሬኢ በዐይንነ ለዘሰማዕኖ በእዝንነ፤ ብዙሐን ይትቀተሉ በሰቂል፤ በሰይፍ፤ በእሳት፤ እንዘ ንሬእዮሙ በብንተ ዐዕይንቲነ። ወበእንተ ዝንቱ መፍትው ንጼሊ ወንመይጥ ልቡናነ ኀበ እግዚአብሔር ከመ ይሚጥ ዐዕይንተ ምሕረቱ ኀቤነ ወኀበ ሐገሪትነ ኢትዮጵያ። ወይፈኑ ለነ መልአኮ ከመ ያቁርር እሳተ ዘይነድድ በውስቴትነ።

እግዚአብሔር ለብዎቶ የሐበነ ወያኅድር በልቡናነ ለዘሰማእኖ ወያፍሪ ፍሬ ሠላሣ ስድሳ ወምዕተ

ወስብሐት ለእግዚአብሔር